Rændi söðlasmið á níræðisaldri

Bíræfinn þjófur rændi söðlasmið á níræðisaldri um miðjan maí. Söðlasmiðurinn er með verkstæði í Mosfellsbæ.

Ræninginn virðist hafa gengið inn á verkstæði söðlasmiðsins í kringum tíunda maí síðastliðinn. Hann var með hnakk sem hann vildi að söðlasmiðurinn gerði við.

Einhver viðsnúningur virðist hafa orðið á erindi mannsins því hann tók tvo hnakka ófrjálsri hendi í stað þess að láta gera við þann bilaða. Andvirði þeirra samanlagt er á annað hundrað þúsund krónur.

Söðlasmiðurinn hafði enga burði til þess að stöðva manninn sem gekk út með hnakkana tvo og sinn eigin sem hann hugðist láta gera við.

Samkvæmt nema mannsins sem leggur stund á söðlasmíði þá nýtti ræninginn sér aldur og líkamsástand söðlasmiðsins á ófyrirleitinn hátt.

Málið var tilkynnt til lögreglunnar viku eftir að það átti sér stað. Söðlasmiðnum var mjög brugðið vegna atviksins.

Hnakkarnir sem maðurinn tók voru annars vegar af gerðinni Viking. Hann svipar til slipphnakksins að sögn nemans og með saumaða dýnu.

Hinn hnakkurinn var ástralskur og heitir Wintec. Hann er úr vínylefni. Nafnið er ritað með gullstöfum í lafið.

Báðir hnakkarnir eru svartir.

Ef einhver hefur orðið var við hnakkana eða veit eitthvað um málið þá er hinum sama bent á að hafa samband við lögregluna í síma 444 1000.