Búist við að 14% landsmanna fari á vanskilaskrá

Fólk í vanskilum fer inn á vanskilaskrá sem getur þýtt snara breytingu á lífsstíl fólks. Búist er við að allt að 14% landsmanna verði komnir á vanskilaskrá þegar botninum verður náð.

Fréttastofa ræddi fyrir skömmu við konu, fyrrverandi bankastarfsmann, sem mælir nú göturnar. Þau hjónin keyptu hús fyrir stóra fjölskyldu sína en þegar konan missti vinnuna hættu þau að geta greitt af lánunum. Hún segir greiðsluaðlögun sniðuga , sé fólk tilbúið til að fórna tilveru sinni sem frjálsir þegnar.

Fréttastofa kannaði í dag hvað væri hæft í þessari lýsingu enda stór hópur í sömu stöðu. Um síðustu mánaðamót voru um 7% af fjárráða Íslendingum á vanskilaskrá, eða 19.101 einstaklingur, samkvæmt Creditinfo á Íslandi. Aðeins einu sinni áður hafa svo margir verið í vanskilum.

Meðal þeirra sem fara inn á vanskilaskrá er fólk sem hefur farið í greiðsluaðlögun vegna lausaskulda og eins fólk sem orðið er gjaldþrota, þ.e. svo lengi sem einhver kröfuhafinn heldur skuldinni lifandi.

En hvað þýðir það fyrir tilveru fólks að vera inni á vanskilaskrá? Það getur reynst fólki erfitt að fá kreditkort og yfirdrátt. Þá er býsna algengt í okkar lánadrifna samfélagi að taka út vörur í reikning eða borga með raðgreiðslum.

Vanskilaskráning gæti því komið í veg fyrir að maður geti endurnýjað tölvuna eða keypt sér utanlandsferð á raðgreiðslum.Nú eða farið í viðhald á húsnæðinu í gegnum reikning hjá byggingarvöruverslunum. Fyrirtæki og verslanir hafa nefnilega rétt til þess að fletta því upp hvort viðskiptavinur sé á vanskilaskrá.

Vanskil tvöfölduðust í finnsku bankakreppunni og voru 12-14% finna komnir á vanskilaskrá þegar kreppan var dýpst.