Börðu og bundu húsráðanda

 Innbrotsþjófar börðu úrsmið á áttræðisaldri í andlitið og skildu hann eftir bundinn eftir að þeir rændu heimili hans á Seltjarnarnesi á mánudagskvöld.

Maðurinn kom að tveimur innbrotsþjófum þegar hann kom heim um klukkan 20 um kvöldið. Annar mannanna sló hann umsvifalaust í andlitið, og í kjölfarið bundu mennirnir hann á höndum og fótum.

„Ég er bara heppinn að lifa þetta af," sagði maðurinn í samtali við fréttavef Vísis. Hann treysti sér ekki til að ræða við Fréttablaðið í gær.

Þjófarnir tóku um 60 úr og eitthvað af skartgripum áður en þeir hurfu á braut. Manninum tókst að losa sig eftir um tuttugu mínútur, og gat kallað eftir aðstoð. Hann var fluttur á slysadeild til aðhlynningar, en fékk að fara heim að skoðun lokinni.

Maðurinn gat lýst öðrum árásarmanninum fyrir lögreglu. Hann er grannvaxinn maður um tvítugt, um 178 sentimetrar á hæð, með brún augu og virtist sólbrúnn á hörund. Hann var með bláan bakpoka úr grófu strigaefni. Mennirnir eru báðir Íslendingar. Húsráðandi taldi sig muna að annar mannanna hafi kallað hinn Marra, eða svipuðu gælunafni.

Von var á fréttatilkynningu frá lögreglu vegna málsins seint í gærkvöldi, en hún hafði ekki borist þegar Fréttablaðið fór í prentun.

- bj