Fjalar á leið í aðgerð - Fylkir í markmannsleit

Fjalar Þorgeirsson, markvörður Fylkis, er á leið í aðgerð sem á að flýta fyrir bata hans en frá þessu greinir vefsíðan Fótbolti.net. Ekki er alveg ljóst hve lengi Fjalar verður frá en Fylkismenn eru í leit að markverði til að fylla hans skarð.

Fjalar handleggsbrotnaði í 2-1 sigrinum á Fram í gær. Varamarkvörðurinn Daníel Karlsson stendur líklega í markinu á fimmtudag þegar Fylkir og Fram mætast að nýju, að þessu sinni í VISA-bikarnum.

„Í ljósi þess hvernig liðinu er búið að ganga og mér persónulega þá er þetta augljóslega gríðarlegt áfall fyrir mig," sagði Fjalar við Vísi fyrr í dag.