Borgarahreyfing: Átök hluti af gagnsæi

Stjórn Borgarahreyfingarinnar hefur sent frá sér yfirlýsingu vegna átakafundar sem var haldin í gærkvöldi en þar var framkvæmdarstjóri hreyfingarinnar harðlega gagnrýndur. Hann lagði fram reikning á félagsfundinum þar sem hann óskaði eftir að fá 7.7 milljónir króna fyrir störf sín.

Þar segir meðal annars: „Á almennum félagafundi í gærkvöldi var m.a. sett út á tímabundna ráðningu í stöðu framkvæmdastjóra þinghóps hreyfingarinnar og sitt sýndist hverjum. Gagnrýni eins og kom fram í gær er til þess fallin að auka gagnsæi og bæta ákvarðanatökuferlin innan hreyfingarinnar."

Þá kom enn fremur fram í tilkynningu frá Borgarahreyfingunni að ekki hafið verið tekist á um völd eða peninga á fundinum. Hvorugt væri til að skipta í hreyfingunni.

Birgitta sagði í viðtali við Vísi fyrr í dag að deilan væri stormur í vatnsglasi.

Hér má lesa tilkynninguna í heild sinni:

Í tilefni af frétt Ríkisútvarpsins af "átakafundi" Borgarahreyfingarnar vill stjórn hreyfingarinnar koma því á framfæri að um 600 manns eru skráðir í hreyfinguna og þar situr fólk ekki á skoðunum sínum.

Á almennum félagafundi í gærkvöldi var m.a. sett út á tímabundna ráðningu í stöðu framkvæmdastjóra þinghóps hreyfingarinnar og sitt sýndist hverjum. Gagnrýni eins og kom fram í gær er til þess fallin að auka gagnsæi og bæta ákvarðanatökuferlin innan hreyfingarinnar. Að tekist hafi verið á um völd og peninga er einfaldlega rangt enda lítið um völd og ekkert af peningum innan hreyfingarinnar.