Ferguson útskýrir af hverju Hargreaves spilar ekki

Manchester United aðdáendur hafa þurft að bíða lengi eftir því að sjá Owen Hargreaves spila aftur með Englandsmeisturunum en hann er búinn að vera frá vegna hnémeiðsla í meira en ár.

Hargreaves gekkst undir aðgerð á báðum hnjám hjá hinum þekkta hnésérfræðingi Richard Steadman sem hefur bjargað ferlinum hjá þekktum leikmönnum á borð við Ruud van Nistelrooy, Michael Owen og Ronaldo.

Knattspyrnustjórinn Sir Alex Ferguson hjá United telur hins vegar að nú snúist málið bara um skort á sjálfstrausti og það sé ekkert óeðlilegt þegar menn eru búnir að vera lengi frá.

„Owen er byrjaður að æfa vel en ekki alveg af fullum krafti og hann er því ekki enn kominn á það stig að geta spilað heilu leikina. Þetta er eiginlega fyrst og fremst spurning um sjálfstraust hjá stráknum og við verðum að vera þolinmóðir enda er hann búinn að vera lengi frá," er haft eftir Ferguson.