Kona fannst látin í kofa - dánarorsök óljós

Lögregla verst allra frétta af rannsókn á dánarorsök konu, sem fannst látin í grennd við geymslusvæðið, austan við Reykjanesbraut, á móts við Álverið í Straumsvík undir kvöld í gær.

Áverkar voru á líkinu og var fjölmennt llið rannsóknarlögreglumanna og annarra sérfræðinga hvatt á vettvang og vann að rannsóknum fram á nótt, eftir því sem fréttastofan kemst næst. Að sögn Morgunblaðsins fannst lík konunnar í grennd við dúfnakofa, þegar eigendur dúfnanna ætluðu að fara að gefa þeim. Þeir kölluðu þegar á lögreglu sem girti af stórt svæði.

Ekkert fæst uppgefið nú í morgunsárið, um það hvort einhver hefur verið yfirheyrður eða handtekinn í nótt, í tengslum við rannsóknina.