Framsóknarmenn reiðbúnir til að vinna langt fram á sumar

Þingmenn Framsóknarflokksins eru til í að vinna langt fram á sumar ef vinnan í þinginu snýst um veigamikil mál, segir Gunnar Bragi Sveinsson þingflokksformaður Framsóknarflokksins. „En við sjáum ekki ástæðu til þess að sitja inn á þingi til að ræða einhver smámál ef það má orða það þannig."

Samkvæmt þingsköpum er gert ráð fyrir að Alþingi fari í sumarfrí frá byrjun júní til byrjun september. Helgi Bernódusson, skrifstofustjóri Alþingis, hefur sagt að hann búast allt eins við því að störf þingsins dragist fram eftir sumri.

Forystumenn framsóknarflokksins gagnrýndu harðlega dagskrá Alþingis og áherslur ríkisstjórnarinnar á þingfundi í fyrradag. Varaformaður flokksins sagði ótækt að þingmenn ræddu um meðhöndlun úrgangs og erfðabreyttar lífverur í stað muni brýnni mála.

Gunnar segir að Framsóknarflokkurinn hafi lagt fram greinagóðar tillögur í efnahagsmálum í kosningabaráttunni. Hann vill sjá þær til umfjöllunar í þinginu. „Hvernig sem það er gert verður að taka á vanda heimilanna og við munum styðja allt slíkt, en þetta er eitthvað þarf að gera núna."

Þingflokksformaðurinn kallar jafnframt eftir aðgerðum fyrir fyrirtækin og lækkun stýrivaxta. Þá vill hann að ríkisstjórnin upplýsi hvort að hún eða Alþjóðagjaldeyrissjóðurinn stjórni landinu.

„Við söknum þess að ekki sé verið að ræða þessi stóru mál í sumar en við erum tilbúin að vinna með ríkisstjórninni, og öðrum flokkum, svo að brýn mál nái fram að ganga," segir Gunnar.