Svandís gagnrýnd fyrir seinagang

Lagning nýs vegar um Vattarfjörð og Kjálkafjörð á sunnanverðum Vestfjörðum þarf að fara í umhverfismat, þvert gegn vilja Vegagerðarinnar, samkvæmt úrskurði Svandísar Svavarsdóttur umhverfisráðherra.

Vegagerðin áformar að endurbyggja mjóan og krókóttan malarveg, sem er aðalleiðin milli Patreksfjarðar og Reykjavíkur, en vill einnig stytta leiðina um allt að níu kílómetra með því að þvera tvo fjarðarbotna. Skipulagsstofnun úrskurðaði hins vegar síðastliðinn vetur að vegarlagningin ætti að sæta umhverfismati, þar sem hún kynni að hafa í för með sér umtalsverð umhverfisáhrif.

Vegagerðin kærði þann úrskurð og hafði umhverfisráðherra lögbundinn frest til 28. júní í sumar til að útkljá málið. Niðurstaða ráðherra, að vegurinn skyldi í umhverfismat, kom loks á föstudag, fimm mánuðum eftir að frestur, sem ráðherrann hafði, rann út.

Einar K. Guðfinnsson, þingmaður Sjálfstæðisflokksins, tók málið upp á Alþingi í gær og kvaðst ekki hafa gert ráð fyrir öðru en að umhverfisráðherra kæmist að þessari niðurstöðu. Það væri hins vegar mjög ámælisvert að það skyldi hafa tekið allan þennan tíma að komast að niðurstöðu í ekki stærra máli en þetta. Það væri ekki líðandi að þetta skuli verða einskonar plagsiður.

Rifjað skal upp að umhverfisráðherra sætti gagnrýni í haust fyrir að draga úrskurð um Suðvesturlínur fram yfir lögbundinn frest. Þá liggja fyrir álit umboðsmanns Alþingis þar sem hægur málshraði er ítrekað gagnrýndur.

Svandís Svavarsdóttir lofaði að bæta úr og sagði það áhyggjuefni að töluvert margar athugasemdir hefðu komið frá umboðsmanni Alþingis og fleiri aðilum varðandi afgreiðslutíma mála í umhverfisráðuneytinu. Hún sagði að verið væri að taka á því sérstaklega og þakkaði þingmanninum fyrir að standa vaktina með sér í því.