Koffínmiklir orkudrykkir ekki ætlaðir börnum

Nokkur umræða hefur orðið um svokallaða orkudrykki í ljósi þess að nýjar tegundir sem innihalda mikið koffín hafa nú numið land. Ástæðan fyrir þessu er breyting á reglum en nú eru ekki lengur nein takmörk á magni viðbætts koffíns í drykkjum eins og áður var.

Á heimasíðu neytendasamtakanna segir að þeir drykkir sem innihalda mikið koffín séu ekki ætlaðir börnum en þó megi ætla að það séu helst börn og unglingar sem sæki í þessa drykki. Rétt sé því að benda foreldrum á að hafa augun opin.

„Starfsfólk ÍTR og foreldrafélög hafa m.a. vakið athygli á þessu máli og í Kópavogi hefur verið tekin ákvörðun um að banna neyslu orkudrykkja í félagsmiðstöðvum. Ekki kæmi á óvart þótt fleiri félagsmiðstöðvar fylgdu í kjölfarið."