Partípinni fær skilorð og sekt

Veitingamaðurinn Andrés Pétur Rúnarsson var dæmdur í átta mánaða skilorðsbundið fangelsi í Héraðsdómi Reykjavíkur í dag fyrir skattsvik. Hann er ennfremur dæmdur til þess að greiða tæpar tíu milljónir í sekt til ríkissjóðs.

Hann var framkvæmdastjóri einkahlutafélagsins Eignasölunnar Stuðlabergs en félaginu láðist meðal annars að skila inn virðisaukaskattsskýrslum vegna uppgjörstímabilanna frá janúar 2001 til ágúst 2002.

Þá stóð félagið ekki í skilum á skattframtölum félagsins gjaldárin 2002 og 2003, vegna tekjuáranna 2001 og 2002, og þannig ekki talið fram til skatttekjur sem skattskyldar eru.

Brot ákærða gegn lögum um virðisaukaskatt, gegn lögum um bókhald og lögum tekjuskatt teljast í heild vera stórfelld.

Þá þykja brotin að mati héraðsdóms sýna ófyrirleitinn brotahug og það er einnig til þess að þyngja refsingu Andrésar að hann var löggiltur fasteignasali þegar hann framdi þau.

Ákæran gegn Andrési var í þremur liðum. Hann var alfarið sýknaður í einum lið og hluta af hinum tveimur liðunum.

Refsing hans þykir því vera hæfilega ákveðin fangelsi í 8 mánuði og fellur hún niður haldi hann almennt skilorð næstu tvö árin. Hann þarf að greiða 9,6 milljónir í sekt, sem er þreföld upphæðin sem hann var dæmdur fyrir að svíkja út. Greiðist hún ekki innan fjögurra vikna kemur 75 daga fangelsi í staðinn.