Staða okkar verður sterkari 23.október

Höskuldur Þór Þórhallsson þingmaður Framsóknarflokksins bað Guðbjart Hannesson formann fjárlaganefndar að leiðrétta þann misskilning og hræðsluáróður sem hann telur hafa verið uppi í fjölmiðlum undanfarið er snúa að 23.október. Hann sagði að í ljós hefði verið látið að þann dag yrði íslenska ríkið hugsanlega gjaldþrota ef Icesavemálið yrði ekki klárað. Þetta kom fram í óundirbúnum fyrirspurnum á Alþingi fyrir stundu.

Þann dag hefst greiðsluskylda innistæðutrygginasjóðs en Höskuldur sagði að einmitt þá gæti komið upp sú staða sem við þyrftum að koma okkur í gagnvart Hollendingum og Bretum.

„Þá gæti staðan batnað til muna vegna þess að þá er það undir þeim komið að sækja mál á hendur innistæðutryggingarsjóði. Og fá þá úr því skorið hvaða fjárhæð það er sem honum ber að greiða."

Guðbjartur sagðist vel geta upplýst fjárlaganefndarmanninn Höskuld Þórhallsson um hvaða viðvaranir nefndin hefði fengið um hvað gæti gerst þann 23.október ef ríkið stæði ekki í skilum.

Hann sagði að aðilar Seðlabankans og atvinnulífsins hefðu varað nefndina við. Lánafyrirgreiðslur gætu gengið hægar fyrir sig og við ættum erfiðara með að ná okkur út úr vandanum. Við yrðum að eiga góð samskipti við alþjóðasamfélagið og vera ekki í óvinskap við nágrannaþjóðirnar.

Hann sagði ennfremur að fyrirvararnir hefðu verið settir inn til þess að sleppa við að koma okkur í þá stöðu sem nú stefnir í, verði málið ekki leyst.

Höskuldur kom síðan aftur upp og ítrekaði þá afstöðu sína að ekkert myndi gerast 23.október og vitnaði meðal annars í orð tveggja af virtustu lögfræðingum landsins. Hann sagði það vera ábyrgðarhluta hjá þingmönnum að upplýsa þjóðina um þetta.

Hann sagði einnig að af einhverjum ástæðum vildu Samfylkingarmenn ekki að sú staða kæmi upp og það finnst honum ótrúlegt. Hann ítrekaði síðan að staða íslendinga yrði sterkari gagnvart Hollendingum og Bretum ef þeir þyrftu að sækja málið.