Um sjö prósent 16 ára ungmenna ekki í skóla

Skólasókn 16 ára ungmenna á Íslandi haustið 2008 var 93% sé miðað við öll kennsluform. Skólasókn 16 ára ungmenna á landsvísu hefur haldist óbreytt frá haustinu 2006. Þetta kemur fram í nýjum tölum Hagstofunnar yfir skólasókn.

Nokkur munur er á skólasókn 16 ára ungmenna eftir landshlutum. Hlutfallslega flestir 16 ára unglingar sækja skóla á Austurlandi en þar er skólasókn 96%. Hins vegar sækja hlutfallslega fæstir skóla á Suðurnesjum en þar eru 88% 16 ára ungmenna skráð í skóla. Munurinn á milli þessara landshluta er því 8 prósentustig sem er umtalsverður munur.



Skólasókn á milli aldursárganga hefur lækkað

Hagstofan ber saman skólasókn 16, 17 og 18 ára ungmenna með það fyrir augum að sjá hversu hátt hlutfall nemenda heltist úr lestinni eftir fyrsta og annað ár í framhaldsskóla.

Tölur Hagstofunnar sýna að haustið 2008 er hlutfall 17 ára ungmenna í skólum landsins 85% en hlutfall 18 ára er 75%. Skólasókn hefur því lækkað um 8 prósentustig á milli 16 og 17 ára aldursárganganna en um 18 prósentustig á milli 16 og 18 ára árganganna.

105 þúsund nemendur á öllum skólastigum

Skólaárið 2008 til 2009 var heildarfjöldi nemenda á landinu öllu 105.483. Á yfirstandandi skólaári eru skráðir 18.278 nemendur á leikskólastigi, 43.511 nemendur á grunnskólastigi, 25.590 nemendur á framhaldsskólastigi og 18.104 á skólastigum ofar framhaldsskólastigi.

Nemendum á Íslandi hefur fjölgað um 1.265 frá árinu áður, eða um 1,2%.