Hanna Birna víkur sér undan svörum

Hanna Birna Kristjánsdóttir, borgarstjóri, neitar að tjá sig um arðgreiðslu Orkuveitunnar til Reykjavíkurborgar. Dagur B. Eggertsson, oddviti Samfylkingarinnar í borgarstjórn, segir að þetta sé ekki eina erfiða málið þar sem hún víkur sér undan svörum.

Eins og fram kom í fréttum Stöðvar 2 í vikunni er fyrirhuguð arðgreiðsla Orkuveitunnar til eigenda er 800 milljónir króna en upphaflega átti hún að vera 1600 milljónir.

Starfsmenn Orkuveitunnar eru nýlega búnir að taka á sig kjaraskerðingu vegna erfiðrar fjárhagsstöðu félagsins. Reykjavíkurborg er ráðandi eigandi Orkuveitunnar, en Akranesbær og Borgarbyggð eiga einnig hlut.

Dagur B. Eggertsson sakar Hönnu Birnu um að hafa komið sér undan umfjöllun fleiri mála. Hann segir Samfylkinguna þó ekki hafa sett sig upp á móti tilfærslu fés á milli Orkuveitunnar og Reykjavíkurborgar.

Ástæðuna segir hann vera að staða Orkuveitunnar sé slæm, staða borgarinnar sé aftur á móti verri.

Hanna Birna Kristjánsdóttir, borgarstjóri, neitaði að tjá sig um málið þegar fréttastofa leitaði eftir því í dag.