Jóhanna Guðrún: Ég hugsaði stórt og stefndi langt

"Ég hugsaði stórt og stefndi langt," sagði Jóhanna Guðrún í viðtali við RÚV fyrir stundu en hún var hæstánægð með niðurstöðuna sem er jafn árangri Selmu Björnsdóttur árið 1999.

"Þetta splundraði mínum væntingum," sagði Jóhanna Guðrún en aðspurð hvort hún hafi verið stressuð jánkar hún því en bætir við: "Ég er bara svo mikil keppnismanneskja."

Spurð hverju mátti þakka árangurinn segir Jóhanna að það hafi verið einbeitningin og æfingin.

"Þetta var það eina sem ég hugsaði um," sagði Jóhanna Guðrún.

Jóhanna tekur sigrinum með stóískri ró, spurð hvernig hún ætli að fagna áfanganum svarar hún að flugið sé eftir nokkrar klukkustundir.

"Þannig ég tala bara við fólkið og svo fer ég að pakka," sagði Jóhanna að lokum.