Forstjóri Símans sakar Landsbankann um lögbrot

Forstjóri Símans, Sævar Freyr Þráinsson, sakar ríkisbankann Landsbankann um lögbrot í fyrirhuguðum nauðasamningum við Teymi, sem á meðal annars Vodafone. Hann segir skattborgara eiga að taka á sig 30 milljarða króna vegna glannalegra mistaka stjórnenda Teymis. Forstjóri Teymis hafnar því að röð mistaka hafi verið gerð hjá félaginu.

Teymi sem á meðal annars Vodafone, Kögun og Skýrr, er nú í gjörgæslu hjá Landsbankanum og er komið frumvarp til nauðasamninga. Forstjóri Símans segir að í frumvarpinu sé gert ráð fyrir að 30 milljarða skuldir Teymis og dótturfélaga verði afskrifaðar og að ekki verði byrjað að greiða afborganir af þeim lánum sem út af standa fyrr en árið 2011. Verði þetta samþykkt, kollvarpar það fjarskiptamarkaðnum, segir Sævar.

Hann fullyrðir að Teymi hafi verið komið í þrot löngu áður en bankakerfið hrundi, enda hafi eigið fé fyrirtækisins farið úr því að vera jákvætt um 7,5 milljarða í að vera neikvætt um 25 milljarða á 8 mánuðum. Vissulega þurfi að bjarga upplýsingatæknihluta Teymis en ekki Vodafone.

Árni Pétur Jónsson forstjóri Teymis sagði í samtali við fréttastofu í dag að engin leið væri að slíta Vodafone út úr þessum nauðasamningum.

Allir hluthafar Teymis hafi tapað sínu og þótt Vodafone standi ekki illa þá sé móðurfélagið í vandræðum og fullkomlega eðlilegt að kröfuhafar leiti að verðmætum upp í kröfur sínar. Vodafone sé stærsta eign Teymis.