Njörður til bjargar

Björgunarskip og bátar Slysavarnafélagsins Landsbjargar frá Sandgerði, Suðurnesjum og Vogum voru kallaðir út rétt fyrir klukkan 11 í morgun þegar tilkynnt var um tvo menn í sjónum um 500 metra frá landi við Vogastapa.

Mennirnir höfðu verið á sjó á 4 metra plastbáti og fengu yfir sig fyllu og sökk bátur þeirra í kjölfarið. Mennirnir voru í þurrbúningum og gátu haft samband við Neyðarlínu í gegnum farsíma.

Þyrla Landhelgisgæslunnar var kölluð út.

Björgunarbáturinn Njörður Garðarsson frá björgunarsveitinni Suðurnes kom fyrstur að mönnunum um 15 mínútum eftir að útkall barst og náði mönnunum úr sjónum, heilum á húfi.

Farið var með þá að Njarðvíkurbryggju þar sem sjúkrabíll beið þeirra og fór með þá á Heilbrigðisstofnun Suðurnesja til athugunar.