Fyrningarleiðin drepur útgerðir á 6 árum

Engar ákvarðanir hafa verið teknar um hvenær eigi að hefja innköllun á kvóta né hvernig honum verði síðan deilt út að nýju. Það verður gert í nánu samráði við hagsmunaaðila, segir glænýr sjávarútvegsráðherra, Jón Bjarnason. Adolf Guðmundsson, formaður LÍÚ og útgerðarmaður á Seyðisfirði, segir sjávarútvegisfyrirtæki lifa lengst í sex ár eftir að innköllun hefst.

Adolf rekur útgerðarfyrirtækið Gullberg á Seyðisfirði, það er með einn togara og 25 starfsmenn. Fyrirtækið hefur keypt kvóta fyrir um 1200 milljónir króna og veltir um 700 milljónum árlega. Hann segir að fyrningarleið ríkisstjórnarinnar myndi skerða tekjurnar beint um 35-50 milljónir króna á ári, sem myndi lækka laun sjómanna og draga úr möguleika fyrirtækisins til að borga af skuldum sínum.

Í stjórnarsáttmálanum segir að kvótinn verði innkallaður á 20 árum og síðan deilt út að nýju. Afleiðingarnar fyrir sjávarútveginn eru á huldu enda hafa engar útfærslur eða tímasetningar verið ákveðnar og verður það aðeins gert í nánu samráði við hagsmunaaðila segir sjávarútvegsráðherra.

Adolf, formaður LÍÚ, segir það alvarlegt að stjórnarflokkarnir tveir lýsi því yfir að fara fyrningarleiðina án þess að með fylgi útfærsla á því hvernig eigi að innkalla og endurúthluta kvótanum. Adolf segir útgerð sína standa þokkalega og muni lifa gengishrun krónunnar. Hún lifi hins vegar ekki innköllun kvóta og telur að sjávarútvegsfyrirtæki muni ekki standa af sér innköllun kvóta nema í 4-6 ár, að hámarki.