Reiðarslag fyrir Þingeyinga

Framsýn stéttarfélag lýsir yfir megnri óánægju með afstöðu ríkistjórnarinnar til uppbyggingar álvers á Bakka við Húsavík. Í ályktun stjórnar félagsins frá því í gær segir að ljóst sé að ákvörðun stjórnvalda um að skrifa ekki undir viljayfirlýsingu með heimamönnum og Alcoa varðandi uppbyggingu álvers á Bakka sé reiðarslag fyrir Þingeyinga. Ekki síst á sama tíma og atvinnulausum fari fjölgandi og hundruð milljóna flæði út úr ríkisjóði í atvinnuleysisbætur.

Framsýn krefst þess að stjórnvöld endurskoði afstöðuna með það að markmiði að blása nýju lífi í atvinnuuppbyggingu og þar með búsetu í Þingeyjarsýslum og reyndar Norðurlandi öllu.

Í ályktuninni segir að heimamenn og samstarfsaðilar hafi unnið heiðarlega að verkefninu og sett verulega fjármuni í það í fullu samráði við stjórnvöld á hverjum tíma.

„Með ákvörðun stjórnvalda nú, hafa þau brugðist öllu trausti og þar með samstarfsaðilum. Slíkt er með öllu óþolandi og kemur sveitarfélaginu Norðurþingi, Orkuveitu Húsavíkur og íbúum svæðisins í mjög slæma stöðu. Því þarf engan að undra að stéttarfélag, sem hefur yfir 2000 félagsmenn, hafi áhyggjur af stöðunni og framtíðarhorfum," segir í ályktuninni.

Framsýn vill því blása til sóknar með raunhæfum aðgerðum í atvinnumálum, íbúum og þjóðfélaginu til hagsældar.