Dómsmálaráðherra hrökklaðist úr Háskólanum

„Þú ert með blóðugar hendur" og „Ragna morðingi" var meðal þess sem mótmælendur hrópuðu að Rögnu Árnadóttur, dómsmála- og mannréttindaráðherra, á ráðstefnu um mannréttindi og lýðræði í Háskóla Íslands í dag. Hún hvarf á braut án þess að hafa náð að flytja ávarp á ráðstefnunni.

Dómsmálaráðuneytið vísaði þremur flóttamönnum úr landi til Grikklands á miðvikudag á grundvelli Dyflinnarsáttmálans. Mennirnir komu hingað til lands fyrir tæpu ári en þeir eru frá Írak og Afganistan. Mótmælendur segja að mannanna bíði nöturleg vist í Grikklandi og að þeir verði að öllum líkindum sendir til heimalanda sinna í lífshættulegar aðstæður. Í hádeginu fór fram mótmælafundur á Lækjartorgi og þá var ákvörðun ráðuneytisins mótmælt fyrir utan heimili dómsmála- og mannaréttindaráðherra í fyrrakvöld.

Ragna átti að ávarpa ráðstefnuna en gat það ekki vegna þess að mótmælendur gerðu hróp að henni. Samkvæmt heimildum fréttastofu var Ragna meðal annars sögð brjóta mannréttindi og kölluð morðingi. Þá var ráðstefnan sem boðað var til í tilefni 50 ára afmælis Mannréttindadómstóls Evrópu og 60 ára afmælis Evrópuráðsins kölluð fasistaráðstefna.

Ása Ólafsdóttir, aðstoðarmaður ráðherrans, segir að Ragna hafi staðið í pontu um stund og beðið þess að flytja árvarp sitt. Það hafi henni ekki tekist vegna mótmælanna en gera þurfti hlé á ráðstefnunni vegna þessa. „Ragna ákvað að fara til að ráðstefna um þetta mikilvæg efni gæti farið fram."