Götuvændi færist í vöxt í Reykjavík

Götuvændi er að færist í vöxt í Reykjavík að mati greiningardeildar ríkislögreglustjóra. Greiningardeildin varar við að svipað ástand og í höfuðborgum nágrannalanda kunni að skapast í Reyjavík. Þetta kemur fram á vef lögreglunnar.

Í skýrslum greiningardeildar embættisins hefur á undanförnum árum ítrekað verið fjallað um vaxandi umsvif skipulagðra glæpahópa á Íslandi. Jafnframt hefur verið vakin athygli á auknu samstarfi slíkra hópa á vettvangi skipulagðrar glæpastarfsemi. Ríkislögreglustjóri telur ástæðu til að ítreka þessi varnaðarorð.

Greiningardeildin telur að götuvændi sé að færast í vöxt í höfuðborginni. „Einkum er þar um að ræða erlendar konur sem í mörgum tilvikum, hið minnsta, eru fluttar hingað til lands gagngert í þessum tilgangi. Starfsemi sem þessi er oftar en ekki þaulskipulögð og krefst samvinnu hópa og einstaklinga. Oft felur hún í sér nauðung, hótanir, ofbeldi og mansal."



Skipulögð glæpastarfsemi færist í vöxt

Að mati greiningardeildarinnar er aukið vændi, auk skipulagðra innbrota og þjófnaða, ein gleggsta birtingarmynd þess að skipulögð glæpastarfsemi færist í vöxt á Íslandi.

„Í höfuðborgum nágrannalandanna hafa erlendar vændiskonur, sem leita viðskiptavina á götunni, valdið margvíslegum vanda á undanliðnum árum. Þar er um að ræða þaulskipulagða glæpastarfsemi sem erlendir glæpaflokkar halda einkum uppi, oft með aðstoð heimamanna."

Greiningardeildin varar við því að svipað ástand kunni að skapast í Reykjavík verði ekki brugðist við þróun þessari á upphafsstigum hennar.