Gott fyrir blaðamenn

Kristinn Hrafnsson segist ánægður með niðurstöðu Héraðsdóms Reykjavíkur en hann var ásamt Jóhannesi Kr. Kristjánssyni og Ara Edwald sýknaður af kröfu handrukkarans Benjamíns Þórs Þorgrímssonar í dag. Kristinn segist hafa búist við þessari niðurstöðu.

„Það sem er kannski sérstaklega ánægjulegt er að það er tekið mjög fast á þeim rökum sem sem þarna voru inni. Dómarinn virðist vanda vel til verka og rökstyður niðurstöðu sína mjög vel," segir Kristinn.

„Fyrir blaðamenn almennt þá held ég að það sé mjög gott að fá dóm af þessu tagi til þess að skerpa á þessum skilum sem þarna er um rætt. Annarsvegar hvað varðar verndun einkalífsins og síðan tjáningarfrelsið."

Málið snérist um þátt sem sýndur var í Kompás og fjallaði um handrukkun en þar réðist Benjamín að öðrum manni, Ragnari Magnýssyni, en Kompásmenn fylgdust með.

„Þetta er gott innlegg í það hvar þessar línur liggja, hvað fjölmiðlar mega og hvað þeir mega ekki. Þarna var að okkar mati mál sem varðar almannahagsmuni og það er tekið á því í þessum dómi. Þarna er einnig viðurkennt að Kompás var að skila vandaðri vinnu sem er sérstaklega ánægjulegt," segir Kristinn og nefnir digurbarkaleg ummæli ýmissa um að þeir hafi beitt tálbeitu í málinu.

„Það heyrðist meðal annars frá fólki úr blaðamannastéttinni, og má þar minnast á Agnesi Bragadóttur blaðamann sem hélt þessu fram á opinberum vettvangi."

Aðspurður hvort fólk fái að sjá meira af Kompási í framtíðinni en þátturinn var sem kunnugt er tekinn af dagskrá segir Kristinn að þátturinn sé dáinn.

„Við reyndum ýmislegt, og höfum meðal annars talað um það opinberlega, að finna honum farveg á öðrum vettvangi ljósvakans. Það gekk því miður ekki sem er sorglegt þar sem þetta var vinsæll þáttur."