Lennon tók sjálfan sig af velli

Sérstök uppákoma átti sér stað í leik Spurs og Stoke í dag. Enski landsliðsmaðurinn Aaron Lennon hjá Totenham tók sjálfan sig af velli þó svo hann hefði verið beðinn um að halda áfram að spila.

Spurs hafði á þeim tíma notað allar sínar skiptingar. Lennon þrábað um að fara af velli en honum var ekki leyft það. Á endanum var honum nóg boðið og labbaði sjálfur af velli.

„Ég var að vonast til þess að hann gæti haldið áfram en hann gat það augljóslega ekki. Við vitum ekki alveg hvað var að honum," sagði Harry Redknapp, stjóri Spurs.

„Ég var ekki með neina stæla við hann, sagði bara að það yrði slæmt ef við yrðum bara tíu eftir á vellinum. Ökklinn á honum var greinilega bara svona slæmur. Ég vil annars ekki segja meira og gera mál úr þessu," sagði Redknapp.