Vernd uppljóstrara og nektardans bíður

Fjórtán lagafrumvörp voru afgreidd frá Alþingi á þremur síðustu dögum þingsins. Nokkur mál sem þóttu brýn fengu hins vegar ekki afgreiðslu og eru ýmist farin út af borðinu í bili eða bíða þess að vera lögð fram aftur á næsta þingi.

Fyrst ber að nefna frumvarpið um breytingar á stjórnarskránni, sem Sjálfstæðisflokknum tókst að koma í veg fyrir með málþófi.

Stjórnarskrárbreytingar þurfa samþykki tveggja kjörinna þinga og því má ekki búast við öðru slíku frumvarpi fyrr en þegar líða tekur að næstu kosningum. Önnur mál hafa fallið í skuggann af stjórnarskrármálinu.

Meðal þeirra er frumvarp fjármálaráðherra um endurskipulagningu þjóðhagslega mikilvægra atvinnufyrirtækja, eða svokallað eignaumsýslufélag ríkisins. Félaginu var ætlað að taka yfir rekstur fyrirtækja á barmi gjaldþrots sem þjóðin má ekki án vera og endurskipuleggja þau. Stjórnarliðar álitu frumvarpið eitt það mikilvægasta sem fyrir þinginu lá.

Frumvarpið mætti hins vegar andstöðu meirihluta sjálfstæðis- og framsóknarmanna sem tókst að stöðva framgang þess að sinni.

Frumvarp viðskiptaráðherra um ýmsar breytingar á lögum um fjármálamarkaðinn varð ekki heldur að lögum. Í breytingartillögunum fólst að Fjármálaeftirlitið og ákæruvald mættu falla frá hugsanlegri refsingu gegn þeim sem fyrstir upplýsa um afbrot tengd bankahruninu. Uppljóstrarar njóta því engrar slíkrar verndar enn.

Samkvæmt heimildum Fréttablaðsins lögðust allir umsagnar­aðilar þvert gegn frumvarpinu í þáverandi mynd, töldu á því mikil vanhöld og að það byði ýmissi hættu heim. Ekki væri tækt að ákvörðunarvald um niðurfellingu sektar eða ákæru lægi eingöngu hjá þessum stofnunum. Þverpólitísk sátt varð um að setja málið í salt. Ekki er útilokað að endurunnið frumvarp líti dagsins ljós á næsta þingi.

Og fleiri mál mætti nefna:  Frumvarp Lúðvíks Bergvinssonar um persónukjör dagaði uppi í allsherjarnefnd vegna ágreinings.

Bann við kaupum á vændi var lögfest á síðasta degi þings en annað áhersluatriði úr mansalsáætlun félagsmálaráðherra, blátt bann við nektardansi, ekki. Frumvarp Sivjar Friðleifsdóttur þess efnis var ekki afgreitt. Sjálfstæðismenn voru málinu andvígir og ekki þótti hættandi á að taka mál til síðustu umræðu þegar svo skammt lifði af þingi.

Sama ástæða liggur að baki því að þingsályktunartillaga sjálfstæðismanna um svokallað „íslenskt ákvæði“ í Kyoto-bókuninni var ekki afgreidd þrátt fyrir að þeir hafi lagt á hana mikla áherslu. Vinstri græn voru ályktuninni andvíg.

Að síðustu má nefna að málefni listaverka bankanna liggja enn óbætt hjá garði, þrátt fyrir tvær þingsályktunartillögur og frumvarp Kristins H. Gunnarssonar um að færa þau í ríkiseign.

stigur@frettabladid.is