Dalai Lama trekkti að í Háskólanum

Dalai Lama, friðarverðlaunahafi Nóbels, heimsótti Háskóla Íslands í morgun og flutti erindi í Hátíðasalnum í boði rektors Háskólans og Hugvísindasviðs HÍ. Mjög létt var yfir samkomunni og hlógu áheyrendur margsinnis dátt og innilega með Dalai Lama að því er fram kemur í tilkynningu frá skólanum Kristín Ingólfsdóttir, rektor Háskóla Íslands, bauð Dalai Lama velkominn og sagði í máli sínu að það væri skólanum afar mikill heiður að fá hann í heimsókn. Kristín sagði að heimsóknin væri á hárréttum tíma fyrir Íslendinga þar sem hér væri verið að endurhugsa siðferðileg gildi samfélagsins.

Þá segir í tilkynningunni að Dalai Lama hefði, í gegnum tíðina, lagt sig fram við að byggja brýr milli mismunandi samfélaga og vekja athygli á mikilvægi siðferðilegra gilda. „Að því búnu flutti Dalai Lama erindi þar sem meðal annars kom fram að hann teldi að menntun væri mannkyninu afar mikilvæg en nauðsynlegt væri að vekja meiri athygli á siðferðilegum gildum. Til dæmis hefði nútímatækni og mikil þekking leitt til haturs- og ofbeldisverka, og í því efni minntist Dalai Lama á árásirnar 11. september 2001 í Bandaríkjunum."

Eftir ávarp Dalai Lama stýrði Ástráður Eysteinsson, forseti Hugvísindasviðs samræðum Dalai Lama og þriggja háskólamanna, þeirra Páls Skúlasonar, prófessors í heimspeki, Sigríðar Þorgeirsdóttur, dósents í heimspeki og Péturs Péturssonar, prófessors í guðfræði.

„Mikill fjöldi stúdenta, kennara og starfsmanna við Háskóla Íslands sótti samkomuna en fullyrða má að fullt hafi verið út úr dyrum í Háskóla Íslands í orðsins fyllstu," segir ennfremur. „Þegar í morgun hafði nokkur fjöldi safnast framan við Hátíðasalinn þar sem samræðurnar fóru fram en gestir gátu einnig fylgst með samkomunni á tjaldi í anddyri Aðalbyggingar skólans. Hátíðasalur Háskóla Íslands er fullsetinn þegar þetta er skrifað og áheyrendur hafa algerlega fyllt anddyri Aðalbyggingar og nær skarinn út á tröppur hússins. Setið er á gólfi og í stigum í Aðalbyggingu. Heimsókn Dalai Lama í Háskóla Íslands lýkur um hádegisbil."