Öguð hagstjórn forsenda fastgengis

„Að taka upp fastgengi er ekki eitthvað sem við getum ákveðið að gera á morgun,“ segir Vilhjálmur Egilsson, framkvæmdastjóri Samtaka atvinnulífsins. Hann segir að í tengslum við stöðugleikasáttmálann hafi verið rætt um möguleikann á því að taka upp fastgengisstefnu, enda sé núverandi peningamálastefna komin í þrot.

„Það þarf að komast í þá stöðu að gengi krónunnar geti hækkað og orðið stöðugt. Það þarf að stilla af alla hagstjórnina þannig að fastgengi geti staðist,“ segir Vilhjálmur. Hann segir því rétt að setja slík markmið með því að ná árangri í hagstjórn með stöðugri, lítilli verðbólgu. Það eigi að vera útgangspunktur í allri hagstjórn. „Við þyrftum að ná þessu á næstu einu til tveimur árum,“ segir Vilhjálmur.

Steingrímur J. Sigfússon fjármálaráðherra vildi á blaðamannafundi á þriðjudag ekkert gefa upp um hvort fastgengisstefna hefði verið rædd, en margt hefði borið á góma. „Það [fastgengi] er ekkert sem er á dagskrá í sjálfu sér og væri ekki viðráðanlegt, í það minnsta ekki í augnablikinu,“ sagði Steingrímur. - ss