Hvetja fólk til að velja íslenskt

„Okkur líður bara mjög vel með þetta. Það má segja í dag, eftir allt sem er búið að ganga, að þau eru ekki mörg fyrirtækin sem ná fimmtíu ára aldri,“ sagði Helgi Kristófersson, framkvæmdastjóri Múlalundar, ánægður með fimmtíu ára afmælið.

Múlalundur fagnaði fimmtugsafmæli sínu með opnu húsi í höfðustöðvum vinnustofu félagsins í Hátúni 10a í Reykjavík fyrir helgi. Meðal gesta var herra Ólafur Ragnar Grímsson, forseti Íslands.

Til að fagna þessum áfanga ákvað Múlalundur í samvinnu við Nematorg að hrinda af stað nýrri vörulínu sem mun auðvelda tölvunotkun og lestur bóka og dagblaða. Helga finnst mikilvægt að fólk nýti sér íslenskar vörur sem eru til staðar frekar en erlendar. „Þau komu hérna og voru að spá í möguleika og við tókum þeim bara vel,“ segir Helgi um hvernig samstarfið við Nematorg byrjaði.

Vörulínan, sem er alíslensk nýjung, var hönnuð í samráði við lækna, iðjuþjálfa og starfsmenn Múlalundar.

„Ég prófaði þetta á móður minni á Hrafnistu, en hægri höndin á henni virkar ekki vel. Núna getur hún flett og lesið bók sem hún hefur ekki getað lengi og hefur gaman af,“ segir Helgi, en bókastandurinn er einn af nýju vörunum frá Múlalundi.

- hds