Kassabílum stolið frá skátum

Tveimur kassabílum í eigu Sumarbúða Skáta var stolið úr Smáralind á hvítasunnudag. Kassabílarnir höfðu verið notaðir í tengslum við kynningu á sumarbúðum Skáta á Úlfljótsvatni.

Að sögn Helga Jónssonar, verkefnisstjóra hjá Skátasambandi Reykjavíkur, er þetta tilfinnanlegt tjón fyrir sumarbúðirnar. „Það eru til fjórir bílar svo þetta er helmingurinn af flotanum," segir Helgi. Lokað var í Smáralind á hvítasunnudag og því segir Helgi mögulegt að bíógestir hafi tekið bílana ófrjálsri hendi. „Þeir voru bundnir saman. Svo einhver hefur haft fyrir því að losa þá í sundur og hjólað út."

Helgi segist ekki vera með á takteinum hvað nýr bíll sem þessir kostar en hann áætlar að það sé milli 150-200 þúsund krónur. „Svo ef við förum tryggingaleiðina þá getur tekið upp undir mánuð að bæta tjónið. Þá eru sumarbúðirnar bara búnar."

Þeir sem verða varir við grunsamlega ferðir kassabíla eru beðnir um að hafa samband við annaðhvort Bandalag íslenskra skáta í síma 550-9800 eða hreinlega við lögreglu.