Flugbrautahlaupararnir ákærðir fyrir almannahættubrot

Mótmælendurnir Haukur Hilmarsson og Jason Thomas Slade hafa verið ákærðir fyrir að hafa hlaupið inn á flugbraut við Flugstöð Leifs Eiríkssonar í júlí á síðasta ári. Ríkissaksóknari höfðar málið sem var þingfest í héraðsdómi Reykjavíkur í dag. Þess er krafist að þeir verði dæmdir til refsingar fyrir athæfið.

Þeir félagar hlupu inn á flugbraut við flugstöðina að morgni fimmtudagins 3.júlí en þá var verið að fara með Kenýamanninn Paul Ramses úr landi. Mál hans hafði vakið mikla athygli en hann var sendur til Ítalíu um stundarsakir.

Haukur og Jason er ákærðir fyrir húsbrot og almannahættubrot með því að hafa farið í heimildarleysi inn á flugvallarsvæðið við Flugstöð Leifs Eiríkssonar.

Í akærunni segir að þeir hafi því næst klifrað yfir girðinguna og hlaupið mörg hundruð metra innan svæðisins. Eru þeir sagðir hafa raskað með háttsemi sinni öryggi loftfara en á flugvallarsvæðinu voru flugvélar á leið í áætlunarflug og varð að stöðva flugumferð þar til ákærðu voru handsamaðir á flugbrautinni „Charlie".