Ákærður fyrir að stinga og lemja systur sína

Mál ríkissaksóknara gegn 25 ára karlmanni verður þingfest í héraðsdómi Reykjaness í dag. Maðurinn er ákærður fyrir líkamsárás, eignaspjöll og hótanir gagnvart systur sinni. Brotin áttu sér stað þann 21. júní 2008 að heimili systur mannsins.

Í ákæru yfir manninum segir að hann hafi hrint systur sinni á sófaborð þannig að glerplata brotnaði og systirin fallið í gólfið. Síðar sama dag á hann að hafa veist að systur sinni og beitt hana líkamlegu ofbeldi. Slegið hana hnefahöggi í andlitið, lamið höfði hennar upp við píanó, tekið hana tvívegis hálstaki svo hún missti meðvitund. Þá á hann að hafa sparkað í hana þar sem hún lá meðvitundarlítil á gólfinu og stungið hana með hnífi í vinstra læri. Því næst á hann að hafa kastað í hana tölvuskjá.

Hafði þetta þær afleiðingar að systir mannsins hlaut rispur á vinstra augnloki, rifbrot á rifjum 8-9 yfir hægri hlið brjóstkassa og þriggja sentimetra djúpt stungusár í vinstra læri.

Maðurinn er einnig ákærður fyrir að hafa hótað systur sinni lífláti á meðan á líkamsárásinni stóð.

Þá er hann einnig ákærður fyrir að kasta síma systur sinnar niður af svalagangi þannig að hann hafnaði á bifreiðastæði og eyðilagðist. Jafnframt fyrir að hafa eyðilagt tölvuskjá í hennar eigu er hann kastaði honum í átt til hennar.