Sársaukafullar aðgerðir fram undan

Á næsta hálfa ári á að draga úr fjárlagahallanum um tuttugu milljarða króna. Það er aðeins byrjunin, því rætt er um að alls þurfi að stoppa í 170 milljarða króna gat. Umræða síðustu mánaða hefur gert flesta ónæma fyrir háum upphæðum og er því ekki úr vegi að setja tuttugu milljarða í samhengi við útgjöld ríkisins. Heildarfjárlög ársins 2009 nema 556 milljörðum króna.

Dóms- og kirkjumálaráðuneytinu voru samkvæmt fjárlögum á þessu ári ætlaðir 23,5 milljarðar króna. Stærsti útgjaldaliður þess er Lögreglustjórinn á höfuðborgarsvæðinu með 3,2 milljarða og því næst Landhelgisgæslan með 2,7 milljarða.

Landspítalinn er með 33 milljarða króna framlag á fjárlögum þessa árs og 28,2 milljarðar fara í sjúkratryggingar, en þetta eru langhæstu útgjaldaliðir heilbrigðisráðuneytisins. Jóhanna Sigurðardóttir hefur sagt að ekki verði gengið að þeim verst settu í niðurskurðinum, þannig að óljóst er hve mikið er hægt að spara í því ráðuneyti.

Lífeyristryggingar nema um 55 milljörðum króna á árinu, en breytingar á þeim eru vandkvæðum bundnar. Í atvinnuleysistryggingasjóð voru ætlaðir 17,7 milljarðar króna, en ljóst er að viðbótarframlag þarf þar. Sjóðurinn verður uppurinn í október eða nóvember, samkvæmt upplýsingum frá Vinnumálastofnun.

Fæðingarorlof kosta ríkið 10,6 milljarða króna á ári og barnabætur 10,1 milljarð. 7,8 milljarðar fara í vaxtabætur. Þá má geta þess að öll samgönguverkefni ársins 2009 samtals kosta 31,4 milljarða samkvæmt fjárlögunum.

Allt sjávarútvegs- og landbúnaðarráðuneytið fær samkvæmt fjárlögum 17,5 milljarða króna. Hæstu greiðslur þar eru vegna mjólkurframleiðslu, 5,6 milljarðar, og sauðfjárframleiðslu, 4,1 milljarður.

Launagreiðslur hins opinbera nema um 124 milljörðum króna, að lífeyrissjóðsgreiðslum meðtöldum. Ljóst má vera að til að spara tuttugu milljarða á hálfu ári, að ekki sé nú talað um 170 milljarða, verður að hrófla við þeim greiðslum. Launafólk í almenna geiranum hefur margt hvert tekið á sig fimm til tíu prósenta launaskerðingu, eða jafnvel meira.

Nú má búast við að komið sé að opinberum starfsmönnum.kolbeinn@frettabladid.is