Útilokar ekki fleiri yfirtökur

Gylfi Magnússon, viðskiptaráðherra, útilokar ekki að ríkið neyðist til að taka yfir rekstur fleiri fjármálastofnana og settar verði fleiri skilanefndir yfir þær.

Fjármálaeftirlitið beitti neyðarlögunum á Straum Burðarás í dag til að bjarga tugmilljarða innistæðum sem Íbúðalánsjóður og lífeyrissjóðirnir áttu í bankanum og yfirtók rekstur hans. Skilanefnd fer nú með öll málefni Straums.

,,Ég get ekki útilokað það. Maður getur ekki útilokað neitt á svona óvenjulegum tíma. Ég hefði nú reyndar útilokað að ég sæti hér sem viðskiptaráðherra fyrir nokkrum mánuðum þannig að ég vil ekki útiloka neitt frekar en í öðru," sagði Gylfi í Kastljósi í kvöld aðspurður hvort að skilanefndir verði settar yfir fleiri fjármálastofnanir.

Fjármálastofnanir nái að bjarga sér sjálfar

Gylfi sagði verið væri að vinna að lausn á vanda Sparisjóðabankans og annarra fjármálastofnana til að koma í veg fyrir hrun þeirra. Besta lausnin væri að þessi fjármálafyrirtæki næðu að bjarga sér sjálf. ,,Ég vil ekki segja til um líkurnar en það er alls ekki útilokað." Til þess að það gerist þurfi lánadrottnar að sjái sér hag í því að semja um sínar kröfur og eiga þannig kröfur í starfandi fyrirtæki.

Skipt um skoðun varðandi skýrslur endurskoðenda

Gylfi hefur skipt um skoðun hvort opinbera eigi skýrslur endurskoðenda um starfsemi bankanna rétt fyrir hrun og vill ekki að þær verði birtar.

Mikill kostnaður við rekstur skilanefnda

Þá sagði Gylfi að kostnaður við rekstur skilanefnda gömlu bankanna hafa komið sér á óvart en hann sagðist ekki geta upplýst hver kostnaðurinn væri að svo stöddu. Upphæðirnar sem falli á ríkið vegna þeirra væru umtalsverðar.