Önnur sprengjuhótun í Grafarvogi

Starfsfólk 10-11 verslunar við Langarima í Grafarvogi fékk símtal rétt fyrir klukkan ellefu í kvöld með sprengjuhótun. Þegar lögreglumenn komu á vettvang sáu þeir að poki var fyrir utan verslunina og hann merktur sprengja.

Þegar betur var að gáð kom hins vegar í ljós að engin sprengja var í versluninni eða við hana. Lögregla hefur ekki handtekið neinn vegna málsins. Skammt er síðan að starfsfólk og nemendur Borgarholtsskóla í Grafarvogi fengu sprengjuhótun af svipuðum toga. Karlmaður um tvítugt hefur játað að hafa staðið á bak við hana.