Portsmouth sett í straff - má ekki kaupa nýja leikmenn

Enska úrvalsdeildarfélaginu Portsmouth hefur verið bannað að kaupa nýja leikmenn af stjórn deildarinnar vegna vanskila við greiðslur af eldri félagaskiptum félagsins.

Er í því samhengi sérstaklega rætt um kaup félagsins á Glen Johnson sumarið 2007, kaupin á Lassana Diarra í janúar 2008 og Tommy Smith nú í sumar.

Bannið mun standa þangað til Portsmouth hefur greitt upp skuldir sínar að einhverju leyti og því ekki loku skotið fyrir að félagið geti tekið þátt í leikmannamarkaðnum þegar félagaskiptaglugginn opnar í janúar en að öllu óbreyttu mun það ekki geta fengið til sín nýja leikmenn.

„Það er hér með staðfest að Portsmouth má að öllu óbreyttu ekki kaupa nýja leikmenn til félagsins," segir Dan Johnson, talsmaður stjórnar ensku úrvalsdeildarinnar. Landsliðsfyrirliðinn Hermann Hreiðarsson leikur sem kunnugt er með Portsmouth en félagið er sem stendur í botnsæti deildarinnar.