Aquilani og Nasri spila væntanlega í kvöld

Þrír leikir fara fram í enska deildabikarnum í kvöld. Chelsea fær Bolton í heimsókn, Scunthorpe sækir Man. City heim en stórleikurinn er á Emirates þar sem Arsenal og Liverpool mætast.

Bæði lið munu að sjálfsögðu hvíla marga af sínum bestu mönnum líkt og venjulega í þessari keppni og fá því framtíðarstjörnur liðanna að spreyta sig.

Alberto Aquilani fær tækifæri hjá Liverpool en Ítalinn er loksins að verða klár í slaginn. Sömu sögu er að segja af Samir Nasri hjá Arsenal.

Leikurinn verður í beinni á Stöð 2 Sport og hefst útsending klukkan 19.35.