Vill ekki sjá Celtic og Rangers í ensku úrvalsdeildinni

Richard Scudamore, yfirmaður stjórnar ensku úrvalsdeildarinnar, hefur lokað hurðinni á möguleikann á að Glasgow félögin Celtic og Rangers fái inngöngu í ensku úrvalsdeildina.

Forráðamenn Celtic og Rangers hafa verið að leita eftir leiðum síðustu ár til þess að komast á stærra svið en í Skotlandi í þeim tilgangi að afla meiri tekna og til að verða samkeppnishæfari í Evópukeppnum.

Scudamore kveðst skilja afstöðu skosku félaganna en telur ólíklegt að félög á Englandi muni taka hugmyndinni um að þau spili í ensku úrvalsdeildinni fagnandi.

„Skoskur boltinn er alltaf skoski boltinn og fyrir mann eins og mig sem vill halda í hefðirnar þá finnst mér að félögin eigi að spila í Skotlandi. Ég held líka að þau tuttugu félög sem spila í ensku úrvalsdeildinni myndu ekki greiða því atkvæði að skosku félögunum yrði leyft þátttaka í ensku úrvalsdeildinni," segir Scudamore í viðtali við ESPN.