Helgi P: Fjölskyldan sameinast um jólin

„Jólaskapið kemur nú venjulega með matseld," svarar Helgi Pétursson sem sendi frá sér nýja jólaplötu, Gamlir englar, ásamt félögum hans í Ríó Tríó.

„Ég útbý hátíðarpaté og sýð rauðrófur og rauðkál. Ætli það sé ekki ilmurinn af þessu, samhliða jólakortaskrifum og slíku sem minnir á jólin á æskuheimilinu, sem auðvitað eru alltaf í ljósrauðum bjarma í minningunni."

„Og svo kemur að því að maður dregur fram jólaplöturnar og spilar sömu lögin aftur og aftur. Það er ótrúlegt hvað maður er fastheldinn á siðvenjur í tengslum við jólahaldið," segir Helgi og bætir við:

„Svo vitnað sé í Nóbelskáldið á maður orðið marga gulldúkata sem horfa á mann og það dregur heldur ekki úr gleðinni og tilhlökkuninni um ánægulega samveru fjölskyldunnar."

„Annar sonur okkar er erlendis í námi og kemur heim um jólin með fjölskyldu sína, sem er svo sérstakt tilhlökkunarefni," segir Helgi. - elly@365.is

Jólin eru komin á Vísir.is.