Gítarstillir seldur til 134 landa

Tunerific, gítarstillingarforrit sem þróað var af íslenska sprotafyrirtækinu Hugvakanum, hefur vakið gríðarlega athygli eftir að það var sett á markað síðastliðið sumar. Forritið trónir í efsta sæti hjá Ovi, netverslun finnska símarisans Nokia, og hefur nú dreifst til 134 landa á þessum stutta tíma.

Síðastliðið sumar var gítarstillirinn kynntur til sölu á alþjóðavísu í nýrri verslun finnska símarisans. Gítarstillirinn er þróaður fyrir Nokia-síma og er í dag vinsælasta forrit verslunarinnar. Forritið er síðan langvinsælast allra forrita hjá notendum snertiskjásíma frá Nokia.

Tunerific varð til úr meistaraverkefni Guðmundar Freys Jónassonar í samstarfi við leiðbeinanda hans, Jóhann P. Malmquist prófessor. Þeir reka nú saman sprotafyrirtækið Hugvakann, sem hefur það verkefni að sækja á fleiri markaði og þróa frekari forrit í farsíma.

Meðal næstu skrefa fyrirtækisins er að bjóða Tunerific til sölu í verslun Sony PlayNow og bjóða nýja afurð til sölu í Ovi en það er ukulele-stillir og ukulele-hljómabók. Hugvakinn hefur hlotið stuðning Rannís og Nýsköpunar­stöðvar við þróun Tunerific.- shá