Fjórðungur frambjóðenda hefur skilað uppgjöri

Aðeins lítill hluti frambjóðenda sem tóku þátt í prófkjörum stjórnmálaflokkanna vegna alþingiskosninganna í vor hefur skilað fjárhagslegu uppgjöri til Ríkisendurskoðunar. Samtals hafa 83 af 321 frambjóðendum skilað inn umræddum upplýsingum, eða rúmlega fjórðungur.

„Það hafa ekki verið neinar holskeflur að undanförnu en menn hafa ennþá tíma til að skila," segir Lárus Ögmundsson, skrifstofustjóri hjá Ríkisendurskoðun. Skilafrestur rennur út 25. október.

Samkvæmt lögum um fjármál stjórnmálasamtaka og frambjóðenda ber frambjóðendum sem hafa meiri kostnað af prófkjörsbaráttu en 300 þúsund krónur að skila fjárhagslegu uppgjöri vegna hennar til Ríkisendurskoðunar.

Fyrr á þessu ári sendi stofnunin frambjóðendum í prófkjörum vegna þingkosninganna í apríl síðastliðnum bréf þar sem kallað var eftir umræddum upplýsingum. Hafi kostnaður frambjóðenda ekki verið meira en 300 þúsund skal viðkomandi skila Ríkisendurskoðun yfirlýsingu þar sem þær upplýsingar koma fram.

Lárus segir að Ríkisendurskoðun geti ekki beitt sérstökum úrræðum skili frambjóðendur ekki fjárhagslegu uppgjöri vegna prófkjörsþátttöku.

Ekki hefur verið tekin ákvörðun um hvort að birtur verði listi yfir þá frambjóðendur sem skila ekki uppgjöri til stofnunarinnar. „Við erum ekki búin að taka ákvörðun en það kemur vel til greina," segir Lárus.