Helmingi verri staða en í byrjun árs

Framsóknarmenn gagnrýndu harðlega dagskrá Alþingis og áherslur ríkisstjórnarinnar á þingfundi í dag. Varaformaður flokksins fullyrti að staða heimila og fyrirtækja í landinu væri helmingi verri í dag en hún hafi verið við í byrjun árs. Ótækt væri að þingmenn ræddu um meðhöndlun úrgangs og erfðabreyttar lífverur.

Sigmundur Davíð Gunnlaugsson, formaður Framsóknarflokksins, sagði að á dagskrá væri ekki nein mál sem varði brýna hagsmuni íslenskra heimila og fyrirtækja. „Til hvers eru við komin saman í sumar en til þess að ræða þau mál," spurði formaðurinn.

„Ég vil upplýsa hæstvirtann forseta um það að staða heimilanna og fyrirtækjanna er helmingi verri í dag en hún var við upphaf ársins. Það að ríkisstjórnin skuli setja fram sem sín forgangsmál frumvörp um vörumerki, erfðabreyttar lífverur, eiturefni og hættuleg efni, meðhöndlun úrgangs og fleira er þjóðinni ekki bjóðandi," sagði Birkir Jón Jónsson.

Jafnframt sagði Birkir að það væri eðlilegt að stjórnarandstaðan kallaði eftir því að ríkisstjórnin gerði grein fyrir því hvað hún ætlaði að gera í efnahagsmálum í ljósri grafalvarlegri stöðu.

Eygló Harðardóttir, ritari Framsóknarflokksins, sagði að ríkisstjórnin væri ekki að gera neitt fyrir almenning í landinu.

Ásta Ragnheiður Jóhannesdóttir, forseti Alþingis, upplýsti að Jóhanna Sigurðardóttir, forsætisráðherra, muni ræða stöðu efnahagsmála í sérstakri umræðu um málið eftir helgi.