Lampard: United mun sjá eftir því að hafa selt Ronaldo

Frank Lampard hefur varað Manchester United við því að Chelsea ætli að láta þá sjá eftir því að hafa selt Cristiano Ronaldo til Real Madrid. Lampard er líka sannfærður um að Carlo Ancelotti sé rétti maðurinn til að gera Chelsea aftur að enskum meisturum á nýjan leik. Chelsea og Manchester United mætast einmitt í leiknum um Góðgerðaskjöldinn á Wembley í dag.

„Það er mikill missir í Ronaldo. Með honum fara 70 mörk sem hann hefur skorað fyrir liðið undanfarin tvö tímabil. Hann vann oft leiki fyrir United upp á eigin spýtur. Þeir hafa vissulega fullt af frábærum leikmönnum en þó engan annan eins og Ronaldo," sagði Frank Lampard.

Lampard er hrifinn af innkomu Ancelotti en segist þó hafa lært af öllum sex stjórum liðsins á undanförnum sex árum.

„Ég hef lært mikið frá öllum stjórunum. Koma Jose Mourino breytti miklu á mínum ferli en Avram Grant, Phil Scolari og Guus Hiddink komu allir með góða punkta. Ég heppin að hafa lært af mörgum frábærum stjórum," sagði Lampard sem vonast þó eftir að fá stöðugleika í stjórastólinn.

„Carlo stóð sig frábærlega hjá AC Milan. Hans lið hafa mikinn klassa, bæði á vellinum og utan hans. Hann sjálfur hefur mikinn klassa," segir Lampard og bætti við:

„Hann er búinn að tala um sínar áherslur og hugmyndafræði við okkur. Hann er búinn að segja okkur hvernig hann vill sjá okkur spila. Ég var sérstaklega hrifinn af því hvernig hann tók einstaka leikmenn á eintal," sagði Lampard.

„David Beckham elskar hann og hann segir Carlo vera frábæran þjálfara. Hann er ekki bara frábær stjóri því hann er líka frábær maður," sagði Lampard greinilega í skýjunum með nýjan stjórann sinn.