Játaði morðið en sagðist ekki hafa notað vöfflujárn

Bjarki Freyr Sigurgeirsson játaði að hafa orðið Braga Friðþjófssyni að bana í Dalshrauni í Hafnarfirði í ágúst síðast liðnum, við þingfestingu málsins í Héraðsdómi Reykjaness í dag. Bjarki sagðist játa öllu því sem kæmi fram í ákæru málsins að því undanskildu að hann hefði notað vöfflujárn við verknaðinn, líkt og talið er.

Hann játaði því hinsvegar að hafa slegið hann í höfuðið minnst fimm sinnum með tréborði. Foreldrar hins látna fara fram á samtals fjórar milljónir í skaðabætur vegna málsins.

Bjarki mótmælir ekki skaðabótaskyldu í málinu en fór fram á frest til að taka afstöðu til fjárhæðarinnar.

Aðalmeðferð fer fram í málinu þann 9.nóvember en beðið er eftir niðurstöðum úr geðrannsókn á Bjarka Frey. Ekki er talið að sú niðurstaða geti haft áhrif á sakhæfi hans, heldur að hún geti varpað einhverju ljósi á hversvegna hann framdi morðið.