Guðlaugur sýnir starfsfólki lítilsvirðingu

Starfsfólk Heilbrigðisstofnunarinnar á Sauðárkróki átelur ákvörðun Guðlaugs Þórs Þórðarsonar, heilbrigðisráðherra, um að leggja niður stofnunina í núverandi mynd og sameina reksturinn Sjúkrahúsinu á Akureyri. Í ályktun sem samþykkt var á starfsmannafundi fyrr í dag segir að ekkert samráð hefur verið haft við heimamenn um þessi mál. Starfsmenn stofnunnar telja að öryggi sjúklinga sé stefnt í voða.

,,Teljum við þau vinnubrögð sem viðhöfð hafa verið allt frá því að fyrst var ákveðið að sameina stofnanirnar á Sauðárkróki og Blönduósi s.l. vor verulega ámælisverð og bera vott um lítilsvirðingu gagnvart starfsfólki HS," segja starfsmennirnir í ályktun.

Í ályktunin segir að vitað sé að Fjórðungssjúkrahúsið á Akureyri eigi í verulegum erfiðleikum með að ná endum saman rekstrarlega og því þykir starfsfólkinu undarlegt að fela stjórnendum þeirrar stofnunar stærra hlutverk og ábyrgð á mun flóknari stofnun.

,,Við spyrjum hvort hugmyndin sé sú að draga úr þjónustu á Sauðárkróki til þess að stoppa upp í hallan á rekstri FSA? Liggja fyrir tillögur um á hvern hátt megi ná fram áætluðum sparnaði á sameinaðri stofnun? Hver er kostnaður við sameiningu þessara átta stofnana í eina? Er þessi aðgerð þjóðhagslega hagkvæm?

Sameiningin nær yfir stórt landssvæði og milli stofnana er um fjallvegi að fara. Því efumst við um að ná megi fram þeirri hagkvæmni sem boðuð er. Við teljum þvert á móti að kostnaður muni aukast og gæði þjónustu muni hraka stórlega. Öryggi sjúklinga muni einnig verða stefnt í voða," segir í ályktunni.

Starfsmennirnir gagnrýna hversu fáir þingmenn kjördæmisins hafa beitt sér til að stöðva þennan gjörning. Þeir skora á Guðlaug að endurskoða þessi áform og tryggja að Heilbrigðisstofnunin Sauðárkróki fái að halda áfram starfi sínu. ,,Starfsfólk stofnunarinnar er tilbúið að leggja mikið á sig til að tryggja áfram þá góðu þjónustu sem hér er veitt."