Styttist í siðareglur borgarfulltrúa

Lokadrög að siðareglum fyrir borgarfulltrúa og reglum um skráningu fjárhagslegra hagsmuna þeirra liggja fyrir. Langt er síðan fyrst kom til tals innan borgarstjórnar að setja slíkar reglur. Dagur B. Eggertsson, borgarfulltrúi Samfylkingarinnar, vonast til þess að starfshópur á vegum forsætisnefndar skili tillögunum af sér á næstu dögum.

„Þetta er búið að tefjast töluvert en ég geri mér vonir um að það líði ekki margir dagar, hvað þá margar vikur, þangað tilstarfshópurinn skilar af sér," segir Dagur.

Nokkuð er um liðið frá því að fyrst var rætt um að setja siðareglur fyrir borgarfulltrúa. Í ágúst á síðasta ári var starfshópur skipaður til að ljúka gerð siðareglna sem annar hópur hafði lagt til árið 2007.

Borgarráð fjallaði um tillögur starfshópsins í desember síðastliðinum og í framhaldinu fengu borgarstjórnarflokkarnir drögin til umfjöllunar. Það var síðan í mars sem tillögunum var vísað til forsætisnefndar sem skipaði í kjölfarið enn einn starfshópinn. Sá hópur skilar af sér á næstu misserum.

Til að siðareglurnar og reglur um skráningu fjárhagslegra hagsmuna borgarfulltrúa öðlist gildi þarf bæði borgarráð og borgarstjórn að samþykkja þær.