Steingrímur: Össur er frjáls ferða sinna

„Hæstvirtur utanríkisráðherra er frjáls ferða sinn og stjórnar sínum ferðaplönum. Ég geri ráð fyrir að hann hafi talið sig eiga erindi á þennan vettvang. Kannski var hann þarna fyrst og fremst í fræðsluskyni," sagði Steingrímur J. Sigfússon, formaður Vinstri grænna, í umræðum á Alþingi í dag um ferð utanríkisráðherra til Möltu.

Össur Skarphéðinsson heimsótti Möltu í gær og ræddi þar við ráðamenn. Haft var eftir Össuri í þarlendum fjölmiðlum að hann væri að afla aðildarumsókn Íslands að Evrópusambandinu fylgis. Ekki hefur náðst í Össur vegna málsins.

„Eftir því sem mér skilst hefur Alþingi ekki falið honum slíkt verkefni," sagði Birgir Ármannsson, þingmaður Sjálfstæðisflokksins, sem vildi vita hvert erindi ráðherrans hafi verið og hvort hann væri að afla stuðnings við aðild Íslands að Evrópusambandinu. Birgir vildi jafnframt vita í hvaða umboði Össur hefði farið í ferðina til Möltu.

Steingrímur sagði að ekki væri hefð fyrir því að ráðherrar bæru ferðaplön sín undir aðra ráðherra. Hann gat sér þess til að þar sem Össur væri mikill áhugamaður um aðild Íslands að Evrópusambandinu hafi hann viljað ræða við Maltverja um reynslu þeirra af inngöngu í sambandið.

Þá sagði Steingrímur að málið væri í höndum Alþingis og að hann gerði ráð fyrir að Össur færi með umboð sitt í samræmi við formlega stöðu málsins.