Parið var í hefndarleiðangri - stúlkunni sleppt

Karl sem gekk berserksgang með haglabyssu í Breiðholti um helgina var úrskurðaður í gæsluvarðhald síðdegis. Vinkonu hans var vikið úr starfi, og vildi hann hefna sín á fyrrverandi vinnuveitanda hennar.

Sá vopnaði réðst umsvifalaust á húsráðandann og sló hann í andlitið með skafti haglabyssunnar þannig að fossblæddi. Húsráðandinn náði hins vegar með herkjum að loka hurðinni á árásarmanninn, sem brást við með því að hleypa af haglabyssunni, einum fimm skotum, sem höfnuðu í hurðinni og rúðu þar við hliðina á. Mikil mildi þykir að húsráðandinn hafi sloppið ómeiddur.

Svo virðist sem byssumaðurinn hafi beinlínis ætlað að skjóta upp hurðina því öllum skotunum var beint að lásnum. Lítil sem engin ummerki eru annarstaðar á hurðinni. Hann hafði hins vegar ekki erindi sem erfiði hafði sig á bak og burt eftir þetta.

Byssumaðurinn gekk laus í heilan sólarhring eftir árásinni en hann var svo handtekinn nú í morgun, ásamt kærustu sinni. Stúlku sem fædd er árið 1991. Stúlkan og húsráðandinn tengjast. Þar til nýlega vann hún í bakarí þar sem húsráðandinn er yfirmaður. Hann sagði henni upp störfum fyrir skömmu, vegna gruns um að hún hefði stolið peningum í vinnunni.

Hún var augljóslega ekki sátt við þau málalok eins og árás kærasta hennar um helgina ber vitni um. Skötuhjúin voru yfirheyrð í dag og að því loknu var maðurinn úrskurðaður í gæsluvarðhald í eina viku. Stúlkunni var sleppt en héraðsdómari féllst ekki á kröfu lögreglu um gæsluvarðhald yfir henni.