Boðið upp á ókeypis tannlækningar í síðasta sinn

Tannlæknafélag Íslands og Tannlæknadeild Háskóla Íslands bjóða upp á ókeypis tannlækningar fyrir börn og unglinga í síðasta sinn í bili á morgun laugardag. Þetta verður í fjórða sinn sem barnafjölskyldum sem búa við kröpp kjör er boðið upp á fría tannlæknaþjónustu. Stefnt er að því að taka upp þráðinn í haust.

Gríðarleg aðsókn hefur verið á Hjálparvakt tannlækna og seinustu tvö skipti hafa samtals yfir 120 börn og unglingar fengið fría tannlæknaþjónustu. Í bæði skiptin þurfti að vísa börnum frá þar sem langur biðlisti hafði myndast eftir klukkutíma og ekki var hægt að anna fleirum, þrátt fyrir að fleiri stólum hafi verið bætt við.

Fjárhagslegar aðstæður margra heimila hafa breyst til hins verra á undanförnum mánuðum og því viðbúið að mörg heimili neyðist til að spara við sig þegar kemur að tannviðgerðum og eftirliti hjá börnum, að fram kemur í tilkynningu.

„Þá er tannheilsa íslenskra barna sú versta á Norðurlöndum og íslensk börn eru að meðaltali með tvöfalt fleiri skemmdar tennur en börn á hinum Norðurlöndunum. Um 17% barna og unglinga á aldrinum 4-18 ára mæta ekki í reglubundið eftirlit hjá tannlækni, samkvæmt MUNNÍS rannsókninni sem framkvæmd var um allt land árið 2005.“

Þjónunstan verður veitt á milli klukkan 10 og 13 á morgun í húsnæði Tannlæknadeildar Háskóla Íslands, Læknagarði, að Vatnsmýrarvegi 16.

Ekki er tekið við tímapöntunum en ráðstafanir eru gerðar til þess að biðtími verði ávallt hóflegur. Nánari upplýsingar eru veittar hjá Tannlæknadeild Háskóla Íslands í síma 525-4850.