Ördeyða í útboðum í vegagerð á næsta ári

Alþýðusamband Íslands gagnrýndi ríkisstjórnina í gær fyrir að gera lítið til að auka atvinnu með því að ráðast í stórframkvæmdir í samstarfi við lífeyrissjóðina. Þeir bíða tilbúnir með peningana en talsmaður þeirra undraðist í hádegisfréttum Bylgjunnar hversu hægt gengi hjá stjórnvöldum að koma með verkefni til að vinna. Samgöngumiðstöð á Reykjavíkurflugvelli, sem menn töldu í vor að gæti farið einna fyrst af stað, er í óvissu vegna skipulagsþrætu ríkis og borgar um lóðamál. Orku- og stóriðjuframkvæmdir í Helguvík og við Búðarháls, sem ríkisstjórnin hét að greiða fyrir, eru í uppnámi vegna hennar eigin aðgerða.

Í vegagerð er búið að forgangsraða verkefnum í einkaframkvæmd. Breikkun Suðurlandsvegar er fyrst á dagskrá en síðan Vesturlandsvegur og Vaðlaheiðargöng, að sögn Hreins Haraldssonar vegamálastjóra. Það ríkir bara alger óvissa um hvenær, þar sem þetta er bundið því að taka þurfi upp veggjöld, til að endurgreiða lán sem lífeyrissjóðir veita í framkvæmdirnar.

Mesta framkvæmdafé fjárlaga hefur verið á sviði vegagerðar en þau verkefni, sem þegar eru í gangi, eins og tvenn jarðgöng, þurrka að mestu upp þá níu milljarða króna, sem áformaðir eru á næsta ári. Því verður ekki rými fyrir nein ný stærri útboð á næsta ári, að sögn vegamálastjóra.