Nemendur Árskóla mynduðu friðarkeðju

„Friður sé með þér" hljómaði mörg hundruð sinnum í morgun þegar nemendur, starfsfólk og foreldrar nemenda við Árskóla mynduðu friðarkeðju upp eftir öllum Kirkjustígnum við Nafirnar á Sauðárkróki.

Friðargangan er árleg hjá Árskóla og er hún gengin föstudaginn fyrir fyrsta sunnudag í aðventu, að því er fram kemur á fréttavefnum Feyki. Ljósalugt gengur á milli barnanna frá 1. bekk og upp í 10. bekk og enda þau síðan með því að tendra ljósin á Krossinum sem stendur á Nöfunum á aðventu og fram á nýja árið.

Friðargönguna enduðu nemendur síðan í Árskóla við Freyjugötu þar sem boðið var upp á piparkökur og heitt kakó sem kom sér vel í froststillunni.