Sérsveitin fór í húsleit og fann skotvopn

Lögreglan í Borgarnesi óskaði eftir aðstoð sérsveitar Ríkislögreglustjóra og lögreglunnar á Akranesi í fyrrakvöld eftir að í ljós kom að skotvopnum hefði verið stolið úr bifreið í fjöru við Höfn í Melasveit. Að sögn Theodórs Guðmundssonar yfirlögregluþjóns í Borgarnesi beindist grunur fljótlega að manni sem býr í grenndinni og hefur áður komist í kast við lögin. Í kjölfarið var ákveðið að gera húsleit hjá manninum.

„Þar fundust síðan tvær byssur og þar að auki þrír aðrir rifflar sem hann gat ekki gert grein fyrir en einnig fundust skotfæri á svæðinu," segir Theodór en maðurinn var ekki með skotvopnin í læstum skáp eins og lög gera ráð fyrir.

Theodór segir að ákveðið hafi verið að kalla eftir aðstoð til þess að leitin gengi hraðar fyrri sig en maðurinn hefur umráð yfir nokkurm húsum á landareign sinni. Venjan er síðan að fá sérsveitin í mál þegar um skotvopn er að ræða.

Leitin gekk vel að sögn Theodórs en átta lögreglumenn og einn hundur tóku þátt í leitinni. Maðurinn var síðan færður til yfirheyrslu en sleppt að henni lokinni. Málið þykir því upplýst að verulegu leyti.